محّد دق؟

مشكلة لمن الواحد يضطر يسافر سياحة في هذا التوقيت الحرج

صج اني مسافر و بعيد و مو قادر اتابع تفاصيل اللي حاصل بالديرة بس تلفوني فيه جوال, و رقمي معروف عند رئيس الوزراء, و بلوقي معروف عند الجهات المختصة, فالسؤال اللي يطرح نفسه

ليش ليلحين محّد دق؟

ليش ما دقوا؟ تلفوني و تلفون زوجتي و تلفون مديرة بيتي مبطلين و قاعد مجابلهم جوود يدق؟ عسى ما شر؟ وين الوعود؟ وين العهود؟ وين الكلام اللي قلناه؟ وين الغرام اللي عشناه؟

صارلي سنة و انا أكتب و مسوي روحي وطني و اصلاحي و ما أتحرش بأصحاب السمو و العلالي علبو انه ياخذوني وزير و للأسف الى الآن ماميش

عموما ما بيدنا شي غير الانتظار و الله يخليكم اذا تعرفون سعادة الريّس وصّوه علي

عموما بما اني بعيد و شايف الساحة تغلي قلت أحط بوست ماله شغل بالسالفة

بنك برقان, كلكم تعرفونه؟

اكتشفت مؤخرا أن الطوابق الأخيرة من البنك تحولت الى نادي للنخبة أو كما يسمونه

Chairman Club

و يحتوي هذا النادي على مطعم و سبا و لاونج و غرفة سيجار و أشياء ثانية ما قدرت أشوفها, كنت أحد المحظوظين اللي حصلوا دعوة من أحد أعضاء النادي اللي عزمنا على الغدا و تمكنت من تصوير بعض المناظر لمدينة الكويت

Enjoy

على فكرة, عضوية النادي يقال انها تتجاوز الثلاثة آلاف دينار بالسنة