Monday, September 19, 2005

حمّود و بو حمّود



بو حمّود: اربط حزام الأمان حبيبي
حمّود: انشالله بابا
بو حمّود يدق السيارة سلف و يحرّك
طبطب, طبطب
حمّود: بابا , شنو هال الحدايد القبيحة الي بالشارع ؟
بو حمّود: هذيل الشجر الصناعي حبيبي
حمّود: شنو فايدتهم بابا؟
طبطب, طبطب
بو حمّود: و لا شي حبيبي. بس في ناس بيربحون فلوس غصب
حمّود: ! بابا,ليش الرصيف كلّه أحمر؟
بو حمّود: ماكو ليش حبيبي. بس في ناس بيربحون ربعهم غصب
طبطب, طبطب
حمّود: ! بابا, ليش الشوارع ضيجة و وايد زحمة؟
بو حمّود: حبيبي عشان شوارعنا قديمة و يوم سووها ما كان اكو هال كثر سيارات
حمّود: بابا, ليش ما نشوف سيارات الشرطة بالشارع؟
بو حمّود: حمّودي الشرطة مو فاضين يفترون بالشوارع, اهم بس تلقاهم بالأماكن الخطرة مثل الحب و البحر
حمّود: بابا دير بالك هسّيارة بتدعمك, شنو عمي هذا؟
طبطب, طبطب
بو حمّود:لا بابا مو عمي بس قاعد يرضع بالتلفون, لا تلومه
حمّود: مو بس اهو بابا, كل الي بالشارع ما يطقّون اشارة و ...و...و...
بو حمّود: عادي حبيبي عادي, نص الي بالشارع مطلعين الليسن بالواسطة
طبطب, طبطب
حمّود: بابا , ليش مطبّاتنا فيها شوارع؟
بو حمّود: وات؟ شتقول حبيبي؟
حمّود: ليش مطبّاتنا فيها شوارع؟
بو حمّود: هممم
طبطب, طبطب
حمّود: ليش مطبّاتنا فيها شوارع؟
-------------------------------------------------------------------------------
الصورة الجديدة مهداة من أحد أصدقاء الموقع يرجى كبسها لرؤيتها بوضوح

5 comments:

Zaydoun said...

حمّود فطين، بس لا يخربونه ربعه اذا كبر ويصير مثل اللي شفتوهم بالشارع

جنة الحواس said...

Ee wallah .. sick of them ..

Mohammad Al-Yousifi said...

اعتقد بان المغزى الحقيقي للمقالة موجود بالسؤال الاخير الي اهو "ليش مطباتنا فيها شوارع" دلالة على كثرة المطبات الي مالها داعي, مرّات أفكر ان في تحدي بين المناطق منو عنده مطبات أكثر, و مثل ما شفنا ان الأب كان يرد على جميع الأسئلة بدون تردد الا السؤال الاخير. باي ذا واي, طبطب طبطب هو صوت السيارة عل مطبة. و شكرا جزيلا على يور سبّورت

bo_ghazi said...

مادري ليش توني أطيح على هالمدونة... خوش شي ماشاالله
:)

نون النساء said...

خوش مدونة

انا ما ادري ليش بطيتها ضحك على هالحوار

الدرامافكاهي

ليش مطباتنا فيها شوارع


اتكسر راسي صراحة وانا اتخيل المطبات

كل وحده بجبل من جبال تورا بورا