Tuesday, May 06, 2008

الادارة , أزمة بلد



قبل أسابيع قليلة اضطررت الى بيع سيارتي القديمة الى أحد الأشخاص , و عملية تحويل السيارة عادة لا تأخذ أكثر من خمس دقائق في أي دولة متحضرة , الا أنها في الكويت دوّختني السبع دوخات

ففي البداية أرسلت المندوب لتخليص المعاملة و لكنهم طلبوا منه حضور المالك الأصلي , توجهت الى تنفيذ الأحكام في الجابرية و دفعت مخالفاتي , بعدها ارسلوني الى خدمة المواطن في الروضة و عندما توجهت الى هناك قالولي اذهب الى مرور العاصمة لأن رقم السيارة على العاصمة , في مرور العاصمة وجهوني للذهاب الى مرور الفروانية لأن الشاري ساكن في محافظة الفروانية

و في ادارة مرور الفروانية رأيت العجب العجاب , فالجو العام في الادارة لا يختلف كثيرا عن أجواء سوق الحراج أو شبرة الخضار , مبنى كئيب يفتقر لأبسط معايير الراحة و الأناقة مع غياب شبه تام لللوحات الارشادية التي توضح للمراجعين أنواع الخدمات المقدمة في هذا المبنى و الى أين يتوجه كل مراجع لانجاز معاملته , طبعا لا أنسى هنا شكر الادارة على استبدال اللوحات الارشادية بملصقات دينية جميلة تتحدث عن عقاب القبر و جزاء من يسب الصحابة

و بما أن المعلومات الارشادية مفقودة فتضطر الى سؤال كل من تطيح عينه بعينك عن مكان تحويل الملكيات و هات يا فتاوي و اقتراحات , واحد يقولك هني و الثاني يقولك هناك , بعد تجربة الوقوف هني و هناك تكتشف أن المعاملة مو هني و لا هناك و لكنها تنجز عند الموظف الجالس على تلك الطاولة الغاطسة بين أمواج المتجمهرين

تتجه اليها و تتجمهر حالك حال العالم لا طابور و لا دور و لا احم و لا دستور , تدز مرسي و تخطّر مزعل و تقول آسف حق عاشور و توصل بالأخير الى موظف كتكوت ينظر لك باستهزاء – لا تحسد عليه – و يقولك شعندك؟

تكلمه بكل أدب و تقوله أخوي بغيت أحوّل السيارة وين أروح؟ يقولك حط الورقة على الطاولة , سألته خلاص؟ أمشي ؟ طالعني بنظرة أخرى مع ثلاثة أرباع ضحكة و قالي انت حمار ؟ بس بدون لا ينطقها

المهم اللورد جمع أوراق المتجمهرين و هو يدخن سيجارته بكل برود و قام من على عرشه ليتوجه الى غرفة تخليص المعاملات تاركا المتجمهرين وراءه يتساءل كل منهم عن معاملته

بعد نصف ساعة يخرج علينا اللورد دي مونت كريستو بالمعاملات و ينادي الجميع للتجمهر بهدوء أمامه من غير زيطة و شوشرة , و تبدأ الانجازات على بركة الله

تاكسي النور

حميد عبدالستار عبدالله

حمد جمعان

خالد محمود

تاكسي العاصفة
....
تاكسي العاصفة
...
تاكسي العاصفة
...
محمد يوسف مكي

رضا موسى أحمد

و هكذا بدأ اللورد بمناداة أصحاب المعاملات المنتهية ليسلم كل شخص معاملته و لكني لم أكن من العشرة المبشرين بتخليص معاملتي في هذه الجولة و اضطررت للأنتظار الى الجولة القادمة

و تأتي الجولة القادمة و نفس العملية الى ثالث أو رابع جولة لأجد اسمي يخرج من فم اللورد فأقفز أمامه لاستلام المعاملة ليقول لي .. مخالفة

اصبت هنا بخيبة أمل و بدأت سؤال كل من هب و دب شنو يعني مخالفة ؟ فقال لي أحد الجماهير يزاه الله خير أنني يجب أن أتوجه الى الطابق الثاني لدفع مخالفاتي و من ثم العودة بالمعاملة الى اللورد

و بالفعل صعدت فوق و دفعت مخالفتي عند موظفة جميلة تلبس حجاب فلنتينو مزركش – يعني فؤاد الهاشم – و عدت الى الأسفل لأصارع المتجمهرين مرة أخرى لتتكرر العملية السابقة مع بعض الاختلافات الطفيفة

و في نهاية القصة خرج علينا اللورد و تفضل بالنطق السامي و تسليمي معاملتي منتهية بعد ساعتين و نصف من الانتظار و البهدلة الفكاهية , أقول بهدلة لأنني اكتشفت عمق الأزمة الادارية التي تعيشها أغلب أجهزة الدولة

طول عمري أنتقد الكويتيين و أردد أننا شعب نعشق كسر القانون و الواسطة , الا أنني اكتشفت الآن بان شعبنا راقي و محترم و أن حكومتنا و أجهزتها هم من يدفع الناس دفعا الى عدم احترام القانون و كسره من خلال ردائة المستوى الاداري في مختلف الأجهزة الحكومية , أضف عليها النفسيات الطيبة لموظفي الحكومة التي لا تشجع أحد على التعامل معهم باستثناء أم حجاب مزركش

يتبع
___________________________________
بعت السيارة بألف دينار

76 comments:

AyyA said...

" الا أنني اكتشفت الآن بان شعبنا راقي و محترم و أن حكومتنا و أجهزتها هم من يدفع الناس دفعا الى عدم احترام القانون و كسره من خلال ردائة المستوى الاداري في مختلف الأجهزة الحكومه"
لول
تو الناس

Salah said...

بالعافية عليك الألف

بس متى العشا؟

المهم

انا ما ودي أضيق خلقك بس تحويل السيارة اهني ما يطول 5 دقايق

1- تعطي السويج حق اللي يبي السيارة وتاخذ فلوسك = دقيقتين

2- تقسم دفتر السيارة الى قسمين وتعطيه قسم بعد ما توقع عليه = دقيقة

3- تحط القسم الثاني في ظرف ودزه بالبريد = دقيقتين

يعني المجموع 4 دقايق

Anonymous said...

من قال لك تبيع؟

Bad-Ran said...

يضيق خلقي لي صار عندي شغل بوزارة

violinist_q8 said...

يعطيك العافيه
صج المعاملات المروريه تنرفز لسبب واحد بالنسبه لي بسبب نفسيات الموظفين ليش الواحد مايشتغل بضمير و يحلل معاشه ؟
وماعندي مشكله لو تتاخر اي معامله دام الموظف زين
=-=

صورة المتسبيشي الي حاطها تذكرني بامريكا كانت سيارة الأحلام لي ههه

The Voice Within said...

يا لهوي! ايه الهباب دا!

انا منك اخليها تقطن عندي لين تصير انتيك عاد خل احفاد احفاد احفاد احفادك يبتلشون فيها و بتحويلها

يسلمو بوست يفش اخلاء الآدمي بوزاراتنا

Eng_Q8 said...

الظاهر سيارتك مو كشخه ى:p

Mr Moody said...

خوش مقال الله يواليك ويعافيك

وين الكويتيين اللي يكتبون مثلك.

مو "يعني فؤاد الهاشم"، يعني كله مطقوق!!!

3etwy said...

وزارة الداخليه اكبر فساد فيها بس ماشفت ولا عضو يتكلم عنها :)
قالو خل نسوي خدمه المواطن للكويتين علشان يخلصون معاملاتهم ومايحتاجون يصفون طوابير مع المقيميين
بس للاسف لمن تروح خدمه المواطن يقولك مالي صلاحيه هالمخالفه لازم تراجع العاصمه علشان تدفعها من عندي ماقدر :)
وترد القصه نفس الي قبل
لا طبنا ولا غدا الشر

بس تعال شنو السياره الي اب 1000؟
جان دللت عليها اهني

Anonymous said...

سلفنا 500 :)

مبروك البيعه

والحمدلله ع السلامة

قول الحمدلله
وادع ربك ان لا يصير منع كفاله بسبب خدامه منحاشة ومسفرينها وانت ماتدري وروح ادفع التذكرة
قصة تبيلها اربع اجزاء

KitKat said...

حالة!! :-)
الله يعين . بس أحلى شي أم حجاب مزركش

سؤال لقافة السيارة موديل أي سنة؟ وشنو ماركتها؟

Anonymous said...

فلوس قناة الراي تسوي شغل والله :)

مقدما للسيارة اليديدة ... الله يعطيك خيرها ويكافيك شرها

جني شفتك بشركة لادا

:)

Lip Service said...

وين ال100 دينار اللي اقرها سمو الامير للطلبة الدراسين بالجامعات الخاصة بالخارج ؟

تم اقرار صرفها من 1 يناير والحين دخلنا شهر مايو هل سيتم صرفها بأثر رجعي ؟

الرجاء من المدونين تسليط الضوء على الموضوع جزاكم الله خير

As YoU LiKE said...

توك تدري ان المصايب كلها من الحكومة :)
كانت تقدر تحط كل شي بالنت .. بس تبي الامة كلها تدور عن واسطة !

raed said...

اتمنى ان تنزل الحكومة الى اداراتها الدنيا وترى الفوضى والتخلف بعينها..هناك فجوه كبيره بين الإدارة العليا والإدارة الدنيا

لماذا وزارة الداخلية تعمل في مبان مؤجرة؟

لماذا لا يطرح المرشحون هذه القضية؟

Organic Kuwait said...

i really enjoy clicking on the links for the pictures nafs soog el 7araay and el chabra hehehe
kesart kha6reee 7ail 7ail i swear everytime my husband needs to go somewhere to get some official paper work done it breaks my heart so much that i cry for him to delay and stay with me instead it even if its something important like my yoga studio we r trying to open!

Unknown said...

كل هاللوية علشان تبيعها اخر شى بالف دينار:(

تصدق لو معطيها المندوب يكد عليها وايد احسن لك :P

wa7id said...

مراجعه يعني قوولون
يعني ضغط يعني سكر

لو الكويت مساحتها بحجم امريكا مثلا
اطلع ورقه من نييورك ..والطابع احطه بفيغاس؟؟
..

الواسطه جات من شويه!

Anonymous said...

إذا كان توماس جفرسون قد كتب إعلان الإستقلال الأمريكي

وإذا كان كارل ماركس قد كتب البيان الشيوعي في أوروبا

فإن إلا نبيذي قد كتب بيان الوحدة الوطنية في الكويت

www.bunashii.wordpress.com

Anonymous said...

المشكله انك تسلم ومايردون عليك السلام وتلقى الاستكرزات الاسلاميه تارسه الطوفه

أبو جيج يدور نعاله said...

كل هذا علشان ألف دينار؟

جان تركتها للسايق يستعملها بالويكند



المهم

ندوة التحالف بالنزهة كانت راقية مع الإزدحام الشديد


و مفاجأة الدائرة الثانية هو المحارب

شفت مقره الجديد بالضاحية؟

يضاهى بحجمه مقر مرزوق الغانم

لو يبتعد عن العصبية بالطرح لأصبح مسلم البراك للمنتخب الأولمبى أو كما كانوا يسمونه بالمنتخب الرديف

Anonymous said...

تبيع سيارتك عشان تعدل مدونتك ؟

:(

سوزوكي ؟

فولفو ؟

هيونداي؟


إشترلك ..

6a6aNanO

لووووووووووول يا حليلها صغيرونه ولونها برتقاني و ماشيه مع الأوضاع الإقتصادية المعصلكة في العالم اليومين دول

الله يكفينا شر الفقرررر

أقول خربها و خذلك لامبرغيني يا فتى

:)

و السيارة ما عم تمشي بدها حدا يزأها زأه ..أهه

كنكرية البحرين said...

Lo0o0o0o0o0o0o0o0L

مرحبا كلة مطقوق ..

شوف ..أنا عندي إحساس أنهم خلوك تلفت السبع لفات عشان بس تحس بقيمة الفلوس الي حصلتها ثمن السيارة .. يعنى إذا كان كل شي ميسر لك .. بتحس ان الفلوس جاتك بالساهل .. وبتلعب فيهم بدون ما تحس .. بس الحين عقب ما دوخوك .. بتعرف قيمة الفلس ...خخخخخخخخ

بيني وبينك .. حالنا في البحرين مثلكم ويمكن أردى .. تشوف الموظف يتكلم في التلفون .. أو يقرا جرايد .. ولا هامنة شي .. أما الي يقهرون صدق الموظفات .. الي تكلمت رافعة خشمها للبانكة .. والي تستهبل عليك .. والي تحقرك .. حشى .. جنة رايحين نطر من عندهم ..

أما حالة المباني الأثرية .. أقصد الوزارية .. فحدث ولا حرج ... بس أنا أتوقع أن حالة المباني تؤثر سلبا على نفسية الموظف .. عشان جدي تشوفة كلة ماااااد البوز ثلاثة أشبار ...خخخخخ

كأني هذرت وااااجد ...:P


تحياتي

nEo said...

اصلا الواسطة حلال بالمرور بس !

5roofa said...

اكره النفسيه مادري ليش يعني كل موظف لازم يكون منفس
مطلوب الشي يعني من اساسيات الشغل؟؟؟

mabroook 3al 1000 :D

salamz dear...

Barrak said...

انت ماتعرف


لو شاري السياره من واحد من محافظة الاحمدي جان مادخت

حلم جميل بوطن أفضل said...

أولا تصحيح لا بد منه

مونت دي كريستو كان كونت و ليس لورد. لذا أقترح أن تعود الى مرور الفروانية و تعتذر من الكونت

ثانياً

العيب فينا لأننا نقبل هذا المستوى. نعم هذا هو المستوى الذي حددته لنا الحكومة. هذا تأثير العمالة الهامشية التي نستجلبها من الخارج

when you pay peanuts, you get monkeys

حنا ندور الرخض فالنتيجة تكون هذا الأداء المتهالك

ثالثاً

شكلك أول مرة تسوي معاملة. و تلومونا إذا تحلطمنا

رابعاً

روح طلع أحمد الربعي من القبر خل يقول تفاءلوا الكويت ما زالت جميلة

و بس
!!

why me said...

لوووووووووول

والله حاله كسيفه

عادي هالموظف المنفس ابكل مكان تعالي شوف لي رحت مستوصف شلون الكاتب منفس وبالغصب يتحجى؟

تعال لي دشيت على الدكتور واليوم الدكتور ماعنده مزاج ويأ حظك انك ادش عنده!

تعال قدم أوراقك عشان وظيفه يقولون لك عند شؤون الموظفين ولما اتروح ولا واحد فيهم يتحاجا!!

شقولك

شي يظيق الخلق



ملاحظه: أم حجاب مزكرش كانت وايد حبوبه لانك ريال
تعال خلي مره ادش عليها وشوف اشلون .. حرب الكواب اتصير ..
لول

خوش بوست
بس ظاق خلقي عليك
وعلى قولة المصرييت
علئه وتفوت ولا حد يموت
;p

ZwaiZ said...

hehehe 3ashan chethi kel shay emsajla eb esim oboy 7eta telephoney inshallah lo kha6 eezee ham besim oboy bas el-walid 3enda 7ikma "lasto ana bel ghobi wala el-ghob yakhda3oni" fa gam yezah allah khair o sawali tawkeel o khalani arakith 7ag sheghli o sheghla ;) .. mabrouk 3alaik el-1000 o dam e6la3at men chabdik 3a6ni eyaha daf3at bela wela sawlina feyha 3asha ;)

bydvsj said...
This comment has been removed by the author.
bydvsj said...
This comment has been removed by the author.
bydvsj said...

اسباب سوء صحه المواطن الكويتى مراجعته لوزاره من الوزارات لانه فى هالحاله راح يرتفع عنده " الضغط والسكر والكوليستيرول"

ياتلاقى الموظف بارد

يا تلاقى ما يدرى وين الله قاطه

يا تلاقيه عصبى ونفسيته خايسه

وايخلون المراجع ايلف سبع لفات لمن ايلاقى الموظف المختص بمعاملته

الواحد مايخلص معاملته الى بطلعه الروح روتين بااايخ ما ندرى متى ننتهى منه:)

واحلى شى تبديل اللوحات الارشاديه بملصقات عذاب القبر وسب الصحابه

اذبحونا بهاللإستيكرزات كل مكان انشوفها وما ادرى شنو الهدف من الملصقات النصيحه او الاستفزاز؟!

ياريت ايسوى استكيرز مكتوب فيه العمل عباده ابركله وراح يضمن الفردوس الاعلى باذن الله

No3iK said...

wow!

allah e3enik ..
shay efashil 9ara7a!!

ana ham nawya abe3 sayarty soon! 7adda mo shay :s

Snow White said...

كل شي في هالبلد ماشي بالمقلوب ! تييهم سيده وبالقانون ما يمشي شغلك لازم تلف وادور وتروح ادور واسطه حتى يمشي شغلك !
مع الأسف :/

Anonymous said...

لو عندي جان صفطتها يم الزبالة
يعني قطيتها بالزبالة
هههههه

ماتسوى السعر الله يهداك
تصرفهم بالعافية
=))

Anonymous said...

تكفه لا تذكرني بمعاملات الحكومة ، بس اهم شي انك قدرت تخلص معاملتك بيوم واحد !!


انا عندي قناعة إن الحكومة عندها لجنة خاصة ( خفية ) تسوي كل شي عشان المواطن ما يخلص معاملته طبيعي :)

فتى الجبل said...

ابتسم...انت في الكويت:(

Mok said...

طالما نحن مجتمع صغير وعائلي

الكسر القانون سيكون موجود

Sn3a said...

والله احنا ليش ندور عالواسطات بنفس الوقت اللي نتشره على من يستخدمها
لان في بعض الاماكن
اكرملك تدور واسطه

يلا ماعليه
المهم خلصت شغلك
وعليك بالعافيه

bof-10 said...

ليش مارحت لنواب الخدمات يخلوصنك ابسرعه ... هههههههههههه
والله ...كل ما ادخل مكان حكومي ... ماادري ليش .... احس اني في سنة 1400... والدنيه كلها لونها اخضر فاتح ...مادري ليش ؟؟؟؟

Anonymous said...

نصيحة للجميع

من خلال موقع خدمات وزارة الداخلية على النت أو من خلال مراجعة أي من مراكز خدمة المواطن المنتشرة بالكويت
كل شهر مرة يمكنكم تجنب ما حدث لزميلنا الخيشي مطقوق


اقترح على مطقوق أن يقيم حفلة عشاء بمطعم البوم لجميع المدونين لهذه المناسبة السعيدة وعلى فكرة تكلفة الشخص بحدود 18 دينار فقط لا غير
وعليكم بالعافيه

Kwaitiyya said...

هذي الكويت بعد شنسوي
ماتشوف إمغرقينا بالواسطات ونواب الخدمات وهالسوالف؟؟؟؟
الحكومة تبي جذي
تستانس جذي
تتلذذ بأذية المواطن
وتتفنن تلعوزه

الله يعين الكويتيين بس
وعلى البركة خلصت شغلك خلال يوم واحد
هذي نعمه من الله انك خلصت بسرعة

مكوكس said...

صديقي و عزيزي بو 1000

أولا حبيت اقولك أن عندي خوش لاب توب

أستعمال خفيف علشانك hp

بألف دينار بالضبط أذا لك خاطر



عموما أحمد ربك أنه

اللورد اللي شفته هناك لو أنك قايله

شي ما يعجبه جان شخط ويهك بالسجينه

اللي بجيبه..دير بالك يا معود ترى

الموظفين صايرين قشران... على فكره آنا

ذاك اليوم مجابل وحده من طقة فخريه

البصريه ناطرها تخلص ريوقها تقريبا

ربع ساعه و لما خلصت

علاف و رحت لها قالتلي أصبر ألحين دور

الشاي و قعدت ترشف من قلاص الشاي

يمكن خمس دقايق و آنا قاعد مجابلها

كأني طمبور طين



يا ليت يعطون هالموظفين نص معاش

و يقعدونهم بالبيت و ييبون موظفين من

الفلبين أبرك لنا

Big Pearls said...

laish bi3t'ha?

متفرغ said...

مبرووك .... ادري ان مافي مجال للمقارنة بس حتى هني بلندن تطلع عيونا فبعض المعاملات .... يعني على سبيل المثال و ليس الحصر .... شركة الهم و الغم و الانصالات بي تي .... اذا تبي شغلك يمشي بسرعة اتصل لهم الصبح -فحدود الساعة ثمان اول ما يبتدون شغل - لكن اذا كنت بايعها اتصل لهم الساعة 11 او 12 عادي تنلطع فالخط لساعة او حتى ساعة و نص و صدقني صارت معاي ...بس لو مو العازة جان ما تعاملت معاهم و القهر انهم يحسبون عليك تكلفة المكالمة عكس شركة الكهربه اي دي اف اذا تنطر لفترة معينة المكالمة تكون ابلاش .... المهم مبروك مرة ثانية :)

honey said...

لوووووووووووووووووووووول ، كنت قاعدة اقرة كتاب عن حالة الشعب العراقي وقت الحصار و كيفية تعامل الموظفين الحكوميين معهم ، و عن مدى الذل في تخليص المعاملة ، و تهالك المبنى ، و حالة الإحباط التي كانت تسود الموجدين بسبب بطء سير آلية العمل و التآزيم في كل شيئ

فالسؤال هو : متأكد إنك ما كنت
بالبصرة بالغلط
:P

Amethyst said...

Wai3;\

I don't want to grow old 3shan I don't deal with that..

عايشة العلي said...

لوووووووووووووووول مو صج والله العظيم يلا ميخالف مبروك عليك الألف دينار ويعطيك خيرها ويكافيك شرها أما بعد عجبني بموضوعك المخالفة اللي خيبت ظنك لول واللورد لووول والموظف الكتكوت المنفس واخيرا ليس آخرا ام حجاب مزركش واهم شي فلنتينو لووول يعطيك العافية ضحكتني

Anonymous said...

يالله الف مبروك مقدما ع السياره الجديد وشكلك بتاخذ بنز على شان ماتبيعها الا بعد 25 سنه وماتشوف اللورد وملحقاته ، وشكرا

Q8-MaNaL said...

لووول الصراحة وايد حلو أسلوبك في كتابة السالفة اهوا الموضوع يقهر لكن الواحد يخفف عليه أسلوبك بكتابتها عاد قاعدة اقرا و أضحك
بس عاد هذي الكويت صل على النبي و بعدين أبسط شي اذا بتعرف مستوى الادارة بديرتنا دق على البدالة و شوف شكثر راح يلطعونك على ما يجاوبونك
والله العظيم اني مرات و انا هني بالكويت ادق على بدالة لندن يجاوبوني بلمح البصر
أحس مادري اضحك وللا ابجي شلون ادق على ديرة ثانية يجاوبوني أسرع من بدالة ديرتي !!!

HOTLINE said...

الاجراءات و الحوسه كلها ما همتني الشي الوحيد اللي ميت و اعرفه ،اهو
جم مخالفاتك ؟؟

Anonymous said...

مطقوق..
احمدالله
لو تكون مريض لا سمح الله
وتضطر تاخذ كل 3 اشهر علاج من مستشفى مبارك لتمنيت الموت على ان تتبهدل وتنذل
حتى ياتون بملفك بعد ساعه ونصف هذا فقط اذا كنت محظوظ ومن ثم يصارخون عليك اللوردات لتاخذ رقم ومن ثم بعد ان تنلطع لمده لا تقل عن 3 ساعات "قسما بالله العظيم" تدش على الدكتور تحب خشمه ومن ثم تاخذك دوائك..
علاجي صار يمرضني !!

Anonymous said...

اللة لا يقطك بالبلدية


عادي تضيع اوراقك

وماجور إنشاللة

Light a Candle said...

It is a real nightmare to go to a government body, but to be fair there are very few exceptions, like Altaameenat. It is one of these few places that you will not hate going there: it's clean, organized, efficient, and (believe it or not) people respect the No Smoking sign and DON'T SMOKE!! and there is of course the tea and coffee and baskooot!!! you really feel like A DECENT HUMAN BEING!

If Altaameenat can do it, why can't other places copy this model?? apparently it is not rocket science!!

Thanks for the lovely post.

Anonymous said...

loooooooooooooooooool

that was a day from hell :)

bs 1000 ?? esh-kent etsoog :) ?

Kuwait said...

يالله ما عليه كل طرااااااق بتعلومه ..
وهالمره شكلك خذيت خوش طراق من المرور .. ;p
تقبل مروري ..
kuwait

someone_q8 said...

السلام عليكم

بوسلمى ما شفت شيء
انا اذا عندي معاملة في اي وزارة انام عدل قبلها عشان ادري ان هالمعاملة راح اروح حق اكثر من مكان في الوزارات و من منطقة لي منطقه
:) ولكم في عالم اللوية :)))

قلب طفله said...

استغفر الله ياربي

صار شي طبيعي العذاب لما تخلص معامله بأي جهه حكوميه تطلع عينك و تجابل النفوس الشينه و روح و تعال و يمكن تخلص بعد جم يوم :(
و ما شاء الله الحظيظ اللي يخلص بنفس اليوم لحظتها تحس بطعم الانتصار لوووول

و الله شي يفشل بس عزائنا

ان الله مع الصابرين

الحمدلله على سلامتك و بالعافيه

عليك الـ 1000 دينار

و ابتسم انت بالكويت :))

Anonymous said...

اشوه اني بنوته وعندي من يدلعني و يسوي المعاملات عني
الله يخلي لي اخواني
والله يعينك ويأجرك على اللي سويته :)

حسام بن ضرار said...

ما تسوى عليك ساعتين و نص عشان ألف

hamdool said...

w ana agoooooooooooool
laish kella ma6gooog !!

الحين بيّنت فيلجا

Mr_CHoCoLaTe said...

سيارتك السوبرا اللي بالصوره ؟

هي هي

الله يعينك والله

و قول الحمدلله خلصتها الحين مو بنص الصيف

والله شنسوي

محد مخرب الديره غير الاداره

دبي اهتمت بالاداره ارتقت بالإماره

باي باي

Zaydoun said...

اللي ما احترق قلبه من معاملات الحكومة والوزارات مو عايش باهالدنيا

أو لذة ومتعة أكبر؟؟ ما أعتقد

Zaydoun said...

تعبت وانا أقول.. الحكم إدارة، مو سلطة ووجاهة

وربعنا ما يعرفون يديرون... لازم نكتب فيهم تقرير

الزين said...

عاد تقديرا منك

ود لها حجاب مو مزركش

عشان تساعد على تحسين الذوق العام

:))

Mohammad Al-Yousifi said...

صكيتوني عين

ترى عمدا حاط السعر عشان لحد يعتقد اني غني

أمس ياي بطلع من الدوام و الا بطارية سيارتي اليديدة مخنسة , شرينا بطارية يديدة ب65 + 10 شغل ايد

اليوم طالع بسيارة زوجتي جان يدعمني واحد من ورا , و طبعا ما يحتاي اقولكم شنو صار بالمخفر و التحقيقات

صلوا عالنبي يا جماعة

شوي شوي علينا

Eagle4 said...

السؤال المهم: شنو ألسيارة و سنة الصنع و جم كيلو ماشية؟ و هل تستاهل كل هالبهذلة؟
و بعدين يا مطقوق وين كنت تسوي معاملاتك بالحكومة؟ أكيد مانشيستر سيتي. والله خليتني أضحك من قلب.
كل اللي اقدر اقولة Welcome to Kuwait

عاقدة النونة said...

واي أنا أقرأ ارتفع ضغطي الله لا يحدني عليهم ، كسرت خاطري :( عموما مبروك عليك المبلغ و تفسفسه بالعافيه بس لا تعودها ترى صحتك تروح فيها و تضطر عقبها تراجع عند مؤسسات حكومية اردى من هاذي

asameee said...

how annoying

White Wings said...

أنا رحت قبل فترة أجدد دفتر السيارة، الله لا يوريك
عشان جذي قررت أحط كل ما أملك باسم زوجي
:)
عيل اشفايدتهم الرياييل؟
:)

Kuw_Son said...

سلملي على الكتكوت :)

آخر مرة رحت أخلص فيها معاملة قبل سنتين !!

الله لا يعودها من أيام !!

فعلا البيروقراطية و العراقيل الإدارية في أجهزتنا الحكومية تطلع في جسمك فقع !!

مبروك البيعة

No3iK said...

kila ma6gog .. salamat yuba
o matshof shar inshalah. .


edfa3 daf3at bala :)

o mashallaaaaaaaaaaah!

Bin3aqool said...

سلملي على بوسوسو وتعيش وزارة الداخلية

متفرغ said...

سلامات ك م .... يمكن لانك ما نحرت دياية جدام السيارة اليديدة ؟

EXzombie said...

شرايك نسوي تحدي نصرف الالف بالقهوة الشعبية.....!!!؟

انا ما قاموا ياخذوني معاهم بالمعاملات الحكومية لأنه لساني طويل، و ما ادري ليش يتعمدون يحطون بالكباين او الفترينات اغبى ما خلق ربك من اوادم.....!!!؟

صلاح الأنصاري said...

معاملة وبمرور الفروانية...من صجك ؟؟؟
لالالالالالالالالالالالالالالا
أعوذ بالله من غضب الله
في واحد يسوي معاملة بمرور الفراونية؟؟؟
الإسبوع اللي فات جددت دفتر سيارة حرمنا المصون وبدلت لوحات الأرقام اليديدة في مرور الفروانية
تصدق لو راد مرتي بيت اهلها وايد أسهل
استغفر الله عاد قربت تصير جدة
اقصد مرتي مو السيارة
انا واحد من الناس اذا كان في يوم عندي معاملة بوزارة الداخلية هذا اليوم يصير يوم عزا لين اخلص المعاملة يخلص العزا