Friday, February 09, 2007

يستاهلون - بوست ارتجالي

صراحة
*
ادري انكم مليتوا من المواضيع المتعلقة بالرياضة و الكرة لكن للأسف انا لا زلت متكدر من اللي حصل
*
طبعا انا مو بس زعلان من خسارتنا في كأس الخليج لكني واحد من الناس اللي يعتبرون الرياضة الكويتية و تاريخها المشرف مصدر فخر و اعتزاز لنا ككويتيين, أيضا انا واحد من الناس اللي يعشق الذهاب الى الملاعب و المشاركة في التشجيع لاحساسي بأنني جزء من المباراة عند تواجدي هناك
*
في الموضوع اللي تحت - مالي خلق - حطيت صورتي مع كأس الخليج 96 و كنت بحاول أكتبلكم عن قصتي مع خليجي 13 و كيف ان فوزنا بكأس الخليج يومها كان فعلا فعلا أسعد يوم في حياتي من بعد يوم تحرير الكويت في 26 فبراير واحد و تسعين, لكن صراحة بعد ما حطيت الصورة و تمقلت فيه,ا خنقتني العبرة و حسيت ان مالي خلق اكتب شي
*
اليوم لاعب كرة بالشاليه و فايز فمزاجي كروي و ودي اكتبلكم قصتي مع خليجي ثلاثتعش
*
كأس الخليج 13 كان في دولة عمان الشقيقة في سنة 96, يومها كنت شاب كويتي مراهق كل همه الكرة و لفت نظر الجنس الآخر
*
منتخبنا بكاس الخليج 13 ما كان يضم جاسم و فتحي و الدخيل و العنبري, لكن المنتخب أيامها كان يضم لاعبين رجال بمعنى الكلمة و كانوا نجوم بالنسبة لنا كشباب في مرحلة المراهقة و منهم بدر حجي و عبيد الشمري و حمد الصالح و أسامة حسين و يوسف دوخي و غيرهم من النجوم
*
لعب منتخبنا الوطني اول مبارتين مع المنتخب العماني و البحريني الشقيقين و كانت ثالث مباراة مع منتخب الامارات الشقيق
*
اذكر يومها انا كنت في رحلة الى دبي مع الوالد و كنت متابع المباراة هناك, منتخبنا كان فايز واحد صفر الى آخر خمس دقايق خقينا و حطوا علينا الامارات جول أول و لحقوه بالثاني و خلصت المباراة اثنين واحد لهم
*
طبعا يومها كان الشيخ أحمد الفهد نجم و دخل غرفة اللاعبين و لا زلت أذكر شكله و هو يقول للاعبين رفعوا راسكم و عطاهم من هالسبيتش الحماسي اللي شد فيه حيل اللاعبين و رفع معنوياتهم
*
المباراة المقبلة كانت مع المنتخب السعودي الشقيق و كانت في يوم و وقت عودتنا الى الكويت, فكنت اتابع المباراة عبر شاشات معرض الالكترونيات اللي في مطار دبي, و اذكر اني كنت كل شوي أهدد الوالد و اقوله اذا فزنا بالمباراة ترى بروح النهائي و الوالد يتحلطم يالله و يالله الطيارة بتطير
*
حمدالله ان حمد الصالح سجل هدف في أول المباراة و استطاع منتخب الكويت الحفاظ على هذا الهدف و انتهت المباراة بفوز الكويت واحد صفر لتنتقل الى المباراة النهائية مع المنتخب القطري الشقيق
*
انا اول ما وصلت الكويت اتصلت بأثنين من ربعي و قلتلهم بكرة نروح الاتحاد و ندفع خمسين دينار عشان نحضر النهائي
*
طبعا الربع خيانة و استبخلوا دفع خمسين عالمباراة فاضطريت اني اروح بروحي و ادفع و اسجل اسمي
*
في يوم المباراة من السبع الصبح الوالد قطني المطار و عطاني عشرة دنانير مصروف جيب ,صراحة كنت منبهر من الجماهير اللي تارسه المطار و القبقب كان مسوي لويه و شيلات و طقطقه
*
توزعنا على طيارتين و طبعا ازرعونا بالطيارة ساعتين و بعد عواصف التحلطم و التبربر طارت الطائرة و وصلت بالسلامة مطار مسقط
*
عند باب المطار كانت الباصات في انتظارنا و سيده من المطار الى الملعب , و هنا رأيت منظر لا يزال متشبص بذاكرتي و يرفض الخروج منها و هو ان الشباب في الباص اللي امامنا كانوا معلقين لافته مكتوب عليها - عفوا, خليجي 13 كويتي- و لا زلت اذكر الانتعاش اللي اصابني من هذه اللافته و كأني رأيتها بالأمس
*
انا كنت مع مجموعة شباب مشاغبين لم نتقبل القعدة في الملعب و ركبنا تاكسي و قلناله ودنا فندق اللاعبين على أمل ان نشوف اللاعبين و نسلم عليهم, و عند الوصول الى الفندق بدأنا بالحوسة في اللوبي على أمل أن نرى واحد من لاعبينا لكن كانوا اللاعبين ممنوعين من النزول, طبعا كونا كويتيين كان لا بد من ممارسة هواية الفهلوة فحاولنا اقناع موظفي الفندق باننا اقارب لبعض أعضاء الوفد الكويتي و لازم نصعد لهم فوق في الغرف لكن ماكو فايدة
أضعف الايمان كان توجهنا الى مطعم الفندق و تناولنا وجبة الغداء في المطعم و تسجيل الفاتورة على غرفة أحد اعضاء الوفد الكويتي
*
بعد الغداء توجهنا الى الملعب و انتظرنا المباراة
*
اعتقد أن كل الكويت حافظه المباراة و تسجيل حمد الصالح للهدف الأول و بزوغ نجم بشار عبدالله بعد تسجيله الهدف الثاني في تلك المباراة و فوز الكويت فيها اثنين واحد
*
بعد توزيع كأس البطولة توجهنا الى الفندق مرة أخرى و لا زلت أشعر بالسعادة عند تذكر تلك اللحظات, كانت دموع الفرح مختلطة بشعور وطني عميق بالفخر و الانتصار كونها أول بطولة تحصل عليها الكويت من بعد الغزو و كون منتخبنا كان ملطشة في كأس الخليج احدعش و اثنعش
*
اذكر كيف كنا نسلم على اللاعبين و نعانقهم و ذهبنا للسلام و المباركة للشيخ احمد الفهد و كنت في قمة السعادة و انا أسلم عليه و ابوسه
*
من الفندق توجهنا مباشرة الى المطار و وصلنا الكويت و نحن ننتظر عودة اللاعبين بالكأس في اليوم التالي و كان الاحتفال في نادي كاظمة
*
طبعا الكويت كانت في حالة هرج و مرج و فرح اسطوري لم أرى مثله الا في يوم التحرير, الناس توقف بالشارع ترقص و تغني و الكل مستانس و يضحك و معلي على صوت الاغاني الوطنية الرياضية
*
طبعا الاحتفال كان بنادي كاظمة و الجمهور من الوناسة ما قدر يصبر و بدينا نشقح بالملعب و نراكض ورا اللاعبين و المدرب و الشيخ احمد الفهد , فعلا لحظات لا تنسى
******
بعد كأس الخليج 13 تمكن المنتخب الكويتي و بجدارة ساحقة الفوز بكأس خليجي 14 و يومها كنت أدرس في الولايات المتحدة و أيضا سوينا مسيرة صغيرة بالجامعة من الفرحة بهالمناسبة
*********
الاسبوع اللي طاف كنت بالامارات و رصدت مظاهر الاحتفالات و الأعياد و المكافآت بمناسبة فوزهم بكأس الخليج و الصراحة انا سعيد جدا للامارات و لسكان الامارات
*
للشيخ زايد آل نهيان رحمه الله و أهل الامارات مكانة خاصة جدا جدا في قلبي لذلك فانا سعيد من أجلهم و أقولهم تستاهلون كل خير يا أهل ديرة الخير













و غير هالمبالغ و السيارات أيضا تلقى اللاعبين هدية كبيرة من الشيخ محمد بن راشد و هي الحصول على منزل في الامارة و المنطقة التي يرغب بها اللاعب
*
عليكم بالعافية و تستاهلون
***************************************************
و بعد هذا الجو الاحتفالي المفرح في دبي عدت الى الكويت لأفتح الصحف و أجد هذا الاعلان المخجل
مواطن كويتي ضاقت به السبل ليضع اعلان مناشدة لسمو الشيخ محمد بن راشد
الظاهر الحبيب يأس من اللي عندنا



______________________________________________
كتبت هذه المقالة بشكل ارتجالي لذلك لا اتوقع ان تكون بالمستوى المطلوب
الاسبوع القادم ستبدأ حملة بس للاصلاح الرياضي و سنبدأ الكتابة عنها و توضيح اهدافها للقراء الكرام
ما أوصيكم, لحد يرتبط يوم 20 فبراير عشان يتمكن من حضور الجلسة





28 comments:

neelaah said...

كله مطقوق
بوست رائع وحر بنفس الوقت
انا لما سمعت انه الحبتور تبرع بثلاث الاف درهم حق كل لاعب
و محمد بن راشد المكتوم قالهم بالمقابله بالتلفزيون
كل واحد يختار البيت اللي يبيه في امارته و احنا نشتريه له
قلبي عورني على لاعبين الكويت
اللي نصهم مو عارف يتزوج
و النص الثاني مدارءهم في وظايفهم حاطين عليهم

صج قلبي عورني
احانا اخر شي ممكن نهتم فيه البشر

تذكرت لما الاخوان بنادي القادسيه عرضو على زيدان مليونين علشان يلعب ثلاث مباريات

يعني عندهم مليونين
و الله لو مقسمينها على عدد اللاعبين
و واعدوهم فيها
جان شفت الشباب بدعوا

بس احنا شعب محبط بكل فئاته
و الناس اللي بيدهم القرار كأنهم يتعمدون احباطنا

ادري طولت بس من الحرة

The Mariner said...

حسافة ... شوف عدد الوطن اليوم .. الصفحة الأولى .. على اليسار تحت

إعلان لا يطوفك ...

queenb said...

i think we complained enough its time to talk about conclusion.we cann`t spend our life just count our mistakes.no everything in life has a key that key reach us what shall do.life is a lessone.not shame make mistaks but what shame not find conclusion!!!!!!!

iDip said...

الحمدلله ع السلامة
:)

متفرغ said...

كي ام عيل احنا فالبحرين شنقول ودنا لو مرة نفوز بالكاس .... احلى كاس خليج عندي اللي صار فالدوحة التنظيم و الافتتاح كان روعة بصراحة ... موفقين انشالله :)

bo9ali7 said...

بالعكس والله
احلى شي الارتجالي
والله ذكرتني بخليجي 13
جني اشوفه الحين
كنت حدي مريض ومتلحف ب17 لحاف
بس كانت فرحة ليلحين اثارها بقلبي

Mohammad Al-Yousifi said...

السلام

فطوم
انا الومه كلش مو حلوة حركته و حاط رقم حسابه, حتى الطرارة لها آداب

نيله
عاد سالفة زيدان هذي نكته

مارينير
والله مو عندي الوطن بس احاول احصلها

شوبا
عاد حمد الصالح؟ كلش مو لايق

كوين
ما قاعدين نتحلطم بالعكس متفائلين بجلسة 20 فبراير و نبيك معانا بالجلسة

آيدب
قلبي

متفرغ
ما نبي الكاس بس عالأقل نبي لعب رياييل

بوصالح
احلى شي يوم قولجي قطر يتهاوش مع الدفاع

يا جماعة الفونتس معتفسين عندي شلون اعدلهم يا اهل البيتا؟

queenB said...

kila ma6goog , don`t blame the guy he asked al-shiekh Mohammed ben Rashid pay his depth.agree not right way .same time feel sorry for him.when be in trouble anyone will do anything even if wrong..we are not in his shoes...

Unknown said...

الله يحفظهم ويحفظ ديرتهم
ويخلف علينا

KQ8 said...

يبا بوسلمى لودامت لغيرك ما اتصلت اليك..عادي امر عادي مو لازم نفوز بكاس الخليج كل مره..مو غصب

والاماراتيين يستاهلون كل خير من حقهم

انااشبه الامارات الحين بكويت السبعينيات

فإللي يمرون فيه الحين جدا عادي

==
بخصوص المواطن اللي يناشد محمد بن راشد

لا تعليق..بس

nEo said...

مطقوق

بوست جميل وايد متناسق
ذكرتني بايام 96 الحلوة ,, بس عبيد هندسة ماكان مع الفريق :)

فقط للتنويه

و الدورة هذيك رجعت لنا عصرنا الذهبي لمدة 3 سنوات فقط ثم انطفأ نور الكرة الى اليوم :(

Almas said...

مرحبا

هالبوست اكثر بوست عجبني وشدني بمسألة الرياضة تدري ليش ؟؟؟ لأنه الكلام طالع من قلبك .. كتبت بكل ما عندك

ذكريات حلوة .. ودنا نغني مرة ثانية .. هذا الكاس يلمع والعيون تدمع .. أياااااام ... انشالله تعود

انشالله الفترة الياية بداية جديدة للرياضة

المواطن إلي يطلب مساعدة .. أقول الحمدالله والشكر .. الله لا يعوز أحد حق أحد .. موقف صعب عالنفس .. وبالعلن .. صعبة .. ألف حمد وشكر لك يا رب

شكرا

KQ8 said...

سؤال..ذكرته..الاعلان المناشده جم كلف المواطن المديون؟؟!!

Unknown said...

اول شى يستاهلون صروفوا فلوس ولو ان مو مقتنع بالفريق الامارات يعنى كان العمانى والعراقى والسعودى وايد احسن
لكن هذى الكرة
انزين هدايا من حقهم لان تخيل هذا اول كأس يدخل فى الامارات من تاريخ تأسيس الامارات لى اليوم
ماكو ولا بطولة فازوا فيها ويمكن هذى فاتحة خير لهم لانهم يستاهلون بلد قاعدةتنتج ليش ما تحصد

الاخ اللى مناشد محمد بن راشد
الصراحةمعذور انا اليوم بطلت الجريدة وشفت طريقة التوزيع مالت فلوس سالم العلى لقيت شئ يفشل الصراحة والله حرام يصيير فينا جذى

خلها على الله وصج ماكو على ايام المراهقة المخ متشتت وطايييير

Q8Maverick said...

كله مطقوق
بوست جميل و مثير للشجون

أعتقد أن فوز الإمارات نتيجة طبيعية للتطور في المجالات الأخرى التي تشهدها دولة الأمارات

و لو لاحظت الهدايا اللي حصل عليها اللاعبين الإماراتيين هي تقريبا نفس الهدايا اللي حصل عليها لاعبي منتخب الكويت في العصر الذهبي في بداية الثمانينات

المهم التركيز على المستقبل و إصلاح الوضع الرياضي

Mohammad Al-Yousifi said...

السلام عليكم

نبارك لنادي القادسية فوزهم على فريقي العربي 3-1 في مباراة ممتازة الصراحة

كوين
انا مقدر ظروف الشخص لكن ما تعتقدين انه فيه اساليب افضل لطلب المساعدة بعيدا عن هالاعلانات؟

فرضا الشيخ محمد ما يبي يساعد الشخص فلما الاحراج؟

عاجل
يستاهلون

كراكوتا
ما اعتقد ان الاعلان يكلف اقل من ميتين دينار

و اكرر اني مو زعلان عشان كاس الخليج , انا زعلان على السيستم كله و الوضع العام من جميع النواحي, المشكلة ان احنا مو قاصرنا شي لكن اطماع ناس و كسل ناس و تخاذل ناس هو اللي ودرنا

نيو
وين كان عبيد الشمري؟

الماس
ثانك يو

مشاري
صراحة الامارات بالدور الاول خربوطة بس في مباراة السعودية و اللي بعدها كانوا فعلا مقاتلين و يستاهلون الكاس

مافرك
انشاءالله المستقبل افضل و متفائلين من تفاعل الشارع هالأيام

يا جماعة البيتا مليق , ساعدوني رحم الله والديكم

بنت الديــــره said...

مرحبا
انا الصراحه قريت الخبر وانحرجت طراره اشكره ناس على مديونيات اكثر من جذي وماسووها .. واللي زاد الطين بله يناشد محمد بن راشد
وينهم ربعنا
سلمل لي على عين عذاري

:)

queenB said...

agree with u not right way, but what realy scare me ,other people start take his step.and everyday will finde one ask suadia,one ask Oman, one qatar and start be style..just say allah yasster..

nEo said...

مطقوق

عبيد حزتها اذا تذكر كانت توها مبلشة نجرته ويا ماتشاالا و كان ما ياخذه و كانت الكويت كلها معصبة عليه (لان الكويت كلها قدساوية مثلي !)

:\

عبيد ماخذاه ماتشالا الى 3 مبارات فقط وحدة منهم تصفيات كأس آسيا مع لبنان جان تذكر اللي الهندي قول فيها فاول و حطوا على الفضلي قول سقاط

:\

blacklight said...

مار أسلم :) صارت موضه لول
أخ يامطقوقنا الغالي مايخلوون الواحد يجابل حياته ومشاغله بسلام.
مره إنتكاس رياضي مره قمع فكري إنترنتي
وطبعا اللي ما يتغير شيوخنا الجعوص
على العموم مواضيعك مالت الرياضه وتحليلك كان أكثر من ممتاز
لك مني أحلى تحيه

enter-q8 said...

عمو تعليق على الطاير لأن ذكرياتك الحلوة ترفع الضغط مع اللي قاعدين نعيشه بحاضرنا
المهم
واحد من الربع داز لي مسج الساعه 11.30
بالليل
يقول
عاجل : تم حل الاتحاد الكويتي لكرة القدم


ما ادري شفيه الولد


بس هذا اللي صار
مع ان مو يوم خميس كان الواحد حط له عذر

تحياتي

Unknown said...

3-1 كافى؟

كان المفروض 6 بس قلنا حرام علشان مطقوق ما يزعل

تدرين شنو حدى مستانس
القادسية وبس :D

3zooz said...

والله ما ادري شعلق وشقول شي يكدر الخااااااااااااااطر اللي وصل له منتخب الكويت .......

تبون الصج مرات تخنقني العبره وودي ما اتاابع ولا مباراة له بالجولات القاادمه هذا اذا في جولات قاادمه.......>>>>>>> اي خير ...... دااام ....... وربعه متربعين بالأتحاد على الدنيا السلااام

Mohammad Al-Yousifi said...

السلام

كتبت تعليق شطوله و ما طلع

العن ابو البيتا

هفففف

مادري اخرتها وين راح نوصل مع هالبلوج

عموما

قلبي يا انتحار

والله بالنسبة لبلا نيله فهم العبوا بالنار مع ليل الين

و مثلك عارف ليل الين واحد ما عنده قلب و مستعد يحرق الخضر و اليابس عشان يحرر اخوه من قبضة المخمليين

اتوقع ان المفروض بيلا تحرر اخو الريال و تدفع الجزية حق بو مريوم يمكن يردولها بلوجها

هذيل مافيا بعيد الشر عني و عنك

داش وياهم وكيح و ديمون و غير اللي ما نعرفهم شغالين من تحت لي تحت

Mother Courage said...

ma6goog!!!

shfeeh il sidebar malek mi3tifis?!

ana ma abey aseer beeta

Mohammad Al-Yousifi said...

شفتي شلون يا مذر؟

تبهذلنا بهالبيتا التعيس

ماني عارف اكتب و لا عارف اعدل السايد بار

ننطر ريما تحن علينا و تعلمنا شلون نضبط البلوج

أبو جيج يدور نعاله said...

بوست مؤثر

بس توقيته صعب

نحن فى مرحلة جديدة


عصر جواد مقصيد بدأ


المهم ما رأيك بكلام النائب العم بو عبد العزيز اليوم عن بطلان قرار الهيئة بحل الإتحاد

لأن الأخ رئيس الهيئة الفلاح ما إجتمع مع بقية الأعضاء و طلع القرارات بشكل إنفرادى دون إجتماع رسمى

و بالتالى كل القرارات تعتبر باطلة حتى يتم الإجتماع و يعاد إصدارها


بداية حلوة و تبشر بالخير لمقصيد


و لأنى متفائل لحد الغناء بصوت عالى...أجد أن الفرصة الآن مواتية لتدخل أعلى سلطات البلد وتصليح الأوضاع برزمة حازمة من القرارات



أما غير ذلك...نظل على بو تركى وايد أبرك لنا

Mohammad Al-Yousifi said...

بو جيج

مع احترامي حق بو عزيز الا انني ما اعتقد ان الدكتور الفلاح صعبة عليه يجتمع مع بقية الأعضاء و يحل الاتحاد مرة ثانية بقرار جماعي

هذا آخر شي يقلق منامهم

بس عموما بو تركي بيضها بالاعلام و عجبني بأنه بايعها و هذا المفروض, خل الناس تعرف الديرة شلون ماشية

و ايضا مؤتمر مرزوق الغانم كان ممتاز و ايضا مؤتمر الشيخ طلال يبشر بالهير خاصة و انه اعلن تأييده لحركة بسسسس

خبر بفلوش , بكرة يبقى ببلاش

اي فلوش

توني ياي من الصالحية و شفت الفلنتانييين لوول