Thursday, May 11, 2006

تذكرت!؟

اليوم و أنا قاعد منحبط بالدوام مجابل المدونات, سرحت بعيد جدا عن ما نراه هذه الأيام

تذكرت الغزو, ليش ؟ لحد يسأل

تذكرت أول يوم الغزو و يمعة أهل أمي ببيتنا لأنه عندنا سرداب
تذكرت قريبنا العسكري, كان ماخذ الفيديو و الأفلام معاه يوم استدعوه عباله غشمرة
تذكرت صوت يوسف مصطفى و دموعه الظاهرة من صوته بالراديو
تذكرت بنت خالتي و هي تحلف تقول ما نعطيهم شبر واحد الكويت
تذكرت فرحتنا يوم درينا ان الشيخ جابر و سعد وصلوا السعودية سالمين
تذكرت صوت ولد خالتي و هو يصارخ فوق السطح الله أكبر
تذكرت أول مظاهرة للنساء جدام فياصل بالجابرية , و أعتقد فيها استشهدت سناء الفودري البطلة
تذكرت دعستي بالكنقية أخشش ذهيبات أمي و خواتي

تذكرت الأهل و هم يرحلون الواحد ورا الثاني عن طريق ايران و جوازاتهم المزورة, اللي حاط اسمه رضا و اللي برويز
تذكرت ابوي و هو يجابل السي أن أن قبل لا يشلعون العراقيين ستلايتنا – أيامها نادر الستالايت و غالي
تذكرت العراقيين و هم ينطون سور بيتنا
تذكرت الرائد الحقير مهند و هو يهدد أمي و ريل خالتي
تذكرت ريل خالتي و هم يضربونه على السلّم, اعترف يا حرامي
تذكرت مهند يقول انتوا الكويتيين تبوقون و تقولون العراقيين حرامية



تذكرت القاري –دراجة هوائية- البي أم أكس اللي شريته و أصر صاحبه أن يستلم دينار كويتي و ليس عراقي
تذكرت ابوي و هو طايح فيني زف و فشش تواير القاري,يوم عرف أني تجاوزت حدود قطعتنا بالقاري و زرت رفيجي بقطعة سبعة
تذكرت مسيد المواش و الشباب الصيع و الدينين كل يوم يطيحوله كرة و طائرة

تذكرت و تذكرت, راح أقولكم شنو بعد تذكرت

تذكرت الطابور على الخباز , الخبزة سمرة و النطرة ساعه يالله يالله تحوشك خبزة و بنظام الكوتا بعد
تذكرت جنود الاحتلال و احنا بشطانة اليهال نقولهم الله يساعدك عيني كل ما نمر عليهم
تذكرت أمي و هي تقول حق ابوي خل نطلع و أهو يرد عليها ببرود يقولها, ليلحين ما صار شي يخلينا نهد الديرة, اهني أأمن من هناك
تذكرت شريط الأهل من لندن, فلان و فلان أمكم تعبانه حاولوا تكلمونها, فلان و فلان كلنا بخير و نسأل عنكم

تذكرت ربعي اليهال يقولون اذا تحررت الكويت بيعطون كل واحد خمسين ألف دينار
تذكرت الهوندا السماوية مالت الاستخبارات و هم يفترون بالفريج و كل العسكريين ايدهم على قلبهم كل واحد يقول طلع اسمي
تذكرت رويشد و سعاد بالليلة المحمدية و جلوسي خلف القنفة عشان ابوي و أمي ما يشوفوني أبكي لمن يقول و مسجد لله بنيتو , بيقول داه مسجدي
تذكرت مقابلات الكويتيين بفندق كونتيل انتل بالشارقة
تذكرت حياكم الله و ها خوتي ها, صدام اسمك هز امريكا صدام اسمك عز و هيبة

تذكرت 17 -1 و تلفون نص الليل, الحرب الجوية بدت
تذكرت صوت الصواريخ و الطيارات و قعدتي بالحوش بالليل مستانس أشوف المضادات
تذكرتني و اخوي الله يرحمه و احنا نلزق الدرايش بالتيوب
تذكرت قطعة الماي و الكهربة ,و سباحتنا بماي الجدر المسخن على الجولة

تذكرت النومة بالسرداب , و آخ آخ على أيام ذاك السرداب

تذكرت المطر الأسود يوصخ بيوتنا, بس والله كنا مستانسين فيه و نعتبره خير من الله
و تذكرت التحرير, كان الجو يومها جو تحرير, مطر و براد و الناس واقفة عند بيبانها ترقص
و تذكرت نقطة سيطرتنا بالفريج, و كل ما مر أحد نقوله هويتك يابه؟
تذكرت بلوفر الفري كويت الأسود و انا كاشخ فيه و الناس تسألني من وين؟ أقولهم من لندن
تذكرت ريل عمتي العسكري و يوم عطاني كيس الكاكاو شلون استانست كأنه معطيني مليون دينار, ركضت من بيتهم لين بيتنا عشان أخش ذاك الكيس و حاضن الكيس كأني أم شايله رضيعها

تذكرت تطوعي بالهلال الأحمر و توزيعنا الأكل عالناس, دوامنا يبدي من السبع لين أربع العصر
تذكرت دقرتي يوم قلت حق الجندي الأمريكي , عطني كبوسك و قالي نو, نحيس
تذكرت اخوي يناديني يقولي يالله رد البيت , بنطلع من الكويت
تذكرت الطابور اللا نهائي على حدود السعودية, أذكر وقفنا هناك تسعتعش ساعة
تذكرت مجلات ماجد اللي ماخذهم معاي للطريج و ترنكسوتي الأصفر و شعري العبيط
تذكرت شيراتون دبي, تذكرت يدي أول ما شافنا و يمعة الأهل فرحانين بجيتنا


تذكرت و تذكرت , يا ليت هالمخ ينسى و ما تذكرت

أيام الغزو, حزينة و سعيدة, مريحة و تعيسة, بس كنا متوحدين

كنا نحب ديرتنا بلا نفاق
كنا نفزع حق بعض بلا أجر
ما كنا نعرف شنو يعني سرقة المال العام
ما كنا نعرف شنو يعني نفاق و تمصلح
ما كنا متلوثين , ما كنا متصارعين على كرسي و كم دينار

يمكن كنا يهال, و يمكن كنا سذج و ما ندري شلي يصير حوالينه

بس أيام الغزو على خوفنا و عذابنا كنا مرتاحين و قلوبنا صافية

عدونا معروف ,صدام مجرم يكره الكويت
أما اليوم للأسف , عدونا رمادي يلبس بشت أسود
و للأسف اهو اخونا من امنا الكويت

لك أموت و أحيا يا كويت

34 comments:

Unknown said...

اقسم بالله ان عيونى دمعت ولكن فى وجهى ابتسامة لان لى الحين فى احد يذكر كل هذا
انا اذكر يوم احترق شعرى وانا اشتغل بالخباز
واذكر يوم كنت اقوم من النوم الساعة 6 الصبح علشان اروح الجمعية

فعلا ما كنا نعرف شنو سرقة مال عام ولا نعرف ناس تسعى لمصالحها الشخصية ولا نعرف ناس تنافق وتكون ذيول حق الكبار

ولكن الواحد يقول هذا المنحنى الطبيعى لنا فالنازل بكل الاصعدة من اقتصاد وتعليم وثقافة وحتى حياتنا الاجتماعية
الله يلعن ابليسك انا اكثر الناس تفاؤلا خليتنى متحبط

Temetwir said...

الله عليك يا كاف ميم
عرفت كيف تجيبها "ريّت" يا ولد

والله يرحم اخوك وموتى المؤمنين اجمعين

iDip said...

آه يا مطقوق... لا اراك الله طقا بعد اليوم

ننطق من العدو لأجل الوطن... قمة التضحية
لكن ننطق من "حماة" الوطن.. يا لسخرية الاقدار

صدقت... ذكرتني بشباب التموين والمقاومة.. ذكرتني بالمدرسة المدججة بالسلاح والاستخبارات... ذكرتني بتطفر الجنود العراقيين لما كنا نلحقهم بالقواري.. ذكرتني بولد جيرانا الاسير.. ذكرتني بمشاوير توصيل اختي لبيت خالتي اللي جدامنا خوفا عليها من الغزاة... ذكرتني بدعاء امي وبتظاهر ابوي بالتماسك امامنا عشان ما نخاف... ذكرتني بجدتي الله يرحمها لما توفت بسبب انقطاع الدواء..ذكرتني بسرداب الجيران... ذكرتني بالخروج من الكويت خوفا على ابي... ذكرتني بهوشتي مع عيال الرياض لما غلطوا عالكويت واهلي يسحبوني وانا اصرخ وابجي... ذكرتني بصواريخ سكود... بعودة خالي من الاسر ..ذكرتني بفرحة التحرير.. ذكرتني بوفاة جدي فرحا بعد ما شاف اولاده الاثنين وكان خايف يموت وما يشوفهم
ذكرتني وذكرتني وذكرتني

والله لم يؤثر في موضوع كهذا
فلنتذكر وحدتنا من اجل الحق


بوركت وشلت يدا من يضربك

Zaydoun said...

اليوم مادري شفيكم تكتبون كتابات تخلي الواحد دمعته تنزل... أو الظاهر انا فيني شي والدموع على طريف

مطقوق... اللي ما عاشوا فترة الغزو صامدين في الكويت مثلنا يحسدوننا على تجربتنا

Unknown said...

إي والله اللي أذكره من أيام طفولتي إهي أيام الغزو. ما أنسى خطة الوالد لا دشوا يفتشون بيتنا, أهو ماسك لكلاش ويرسم لنا البيت بايعها أشوه ما دشوا. وله حصة الرسم بعد الغزو كل اللي تعلمناه نرسم جندي ودبابة.

احنا جيل فتح عيونه على الدنيا وشاف ديرته بحرب وتحررت صعب نخضع للوضع الحالي بهسهولة.

لن ننسى...

جنة الحواس said...

Sooo true !

Badda3t ..I got goose bumps while reading ..



أيام الغزو بالرغم من قساوتها و الويل اللي شفناه منهم ، كانت من أحلى أيام عمري للأسباب اللي ذكرتها

شكرا على البوست الروعة

neelaah said...

اوووووف
كش شعر ينبي

بالفعل ما ادري ليش انا امس بعد الاحباط تذكرت الغزو


يمكن لاني اول مرة اشوف الشعب الصادق كله منتفض لتعديل الدوائر و اخر مرة شفت هالتكاتف بالغزو

بس بالغزو فرحنا لانه الكويت ردت
و الحين...للاسف الكويت ما ردت

Hazolat said...

كله مطقوق
ما قصرت والله خوش كلام محتاجين نسمعه ونذكره ومحتاجين اللي يذكرنا فيه
بس ترى البوق والحرمنه موجود من زمان بس عاد ألحين الفرق انه أشكره وبالهبل
ومن كثر ما الكويتيين كانوا بالغزو إيد وحدة متكاتفين الحكومه ما تحب التذكرة بأيام الغزو
ولا أي نشاط يتكلم ويذكر الشعب بالغزو
فعفيه عليك

نون النساء said...

مع اني ما اتذكر وايد عن الغزو


كانت ايام فعلا نحس ان كلنا على قلب واحد


لكن الحين .......



كلامك يعور القلب

Mother Courage said...
This comment has been removed by a blog administrator.
Mother Courage said...

أنا التحرير لو شنو مانساه .. ماانسا يوم فتحنا باب بيتنا والا ثلاث شباب منسدحين بالشارع الرئيسي و يصيحون و يقولون حق ابوي "عمي تحررنا" والجو كان غيم و كان شتا و انا قاعده بالحديقة امشي الصخلة... كشخة غزو وعندي
pet !

كلة مطقوق حسرت فينا بالبوستات العاطفية ..ماتدري احنا صرنا شرق ورق مافينا حيل حتى نبكي
عسى الله يرحم اخوك ويسكنه فسيح جناته

Mother Courage said...

بعد ماانسا اغنية رابح صقر و نبيل شعيل بالرادو .. انتصرنا والناصر الله



وييي كله مطقوق ... ترا منت خالص مني اليوم ... هذا الموضوع الوحيد اللي ماعرف اسكت فية

Anonymous said...

فعلا أيام لا تنسى :)

ولن انسى بكائي وانا في السنة الرابعة من عمري عندما اسمع صوت اطلاق النار :)


_______

شوفوا هالصوره : http://www.gulfveteransassociation.co.uk/Images/Kuwait.jpg

Anonymous said...

whats your job? any vacancy?

Q8Maverick said...

my tears were flowing as I was reading your post.. sad what's happening in our free country these days reminds us of the darkest days.. really sad..on a happy note these days made us a unit again..

I was watching Al-Sagar nadwa, and I was soo happy seeing Islamic and Liberal MPs standing for the same principle.. for Kuwait.. like we all did during the invasion..

P.S. Never liked Khaled Al-Adwa in my life, but his speech in that Nadwa was sensational

الحجيه said...

السلام عليكم جميعا

الله يهداك كل مطقوق الدنيا بخير والطيبين موجودين مثلك وشرواك لاتنظرون للامور بنظره معتمه المشكله بالدنيا دائما الشيئ الردي يكون على السطح وواضح مع انه قليل وتافه بس ما ادري ليش العالم كل يبرزونه ويبينونه عكس الشيئ الطيب موجود وبكثره وبينا بس مع الاسف مح يلتفتله ولاينتبهله تأكد ان الطيب والخير موجود بعروق هالبلد ولا تنزعج من القله المزعجه بجيها يوم وبتنتهي لان من عمر الدنيا لايدوم الا الاصلح
وسع صدرك واذكر ربك
وتذكر ان الدنيا بالف خير
هذي كويت العز والفخر

lawyer said...

بوستك خلاني اقعد افكر اكثر من الوقت الي قريت فيه
شي يعور القلب
شي يشلع القلب خصوصا اخر السطور

وللاسف الاخو هذا محسوب علينا كويتي!!

Mohammad Al-Yousifi said...

السلام عليكم جميعا

أشكركم كثيرا على القراءة

مشاري
أنا لست محبطا و هالبوست عزيز على قلبي و ليس محبط بالعكس أنا متفائل به

تمتور
مشكور حبي

آيدب
مشكور أخوي و الله يرحم اليد و اليدة و جميع أموات المسلمين انشاءالله, صعب النسيان

الزيدون
صح كلامك, أعتقد انها تجربة نادرة , و تضيف للي عاشها بعد آخر لم و لن يتوفر له من أي تجربة أخرى

داش متعور
أجل لن ننسى, ليس حقدا او بغضا . لكنه واجبنا اتجاه الدماء التي اهرقت في سبيل تراب هذه الأرض

بروك
مشكورة انتي على القراءة و مهما تكلمنا عن الغزو ما راح نوفيه حقه

نيله
الكويت ترد و هذا هو دولاب التاريخ يدور و نحن ندور معه, لهم يوم و لنا يوم

هزلت
مشكور حبيبي, و انا قلت يمكن ما كنا ندري عن البوق لأن كنا يهال لاهين بالهداف و فلونه, شعرفنا شنو بوق

كويت بروف
عجيب المثل, لعنة الله علي الغزو مالهم خلانا ننحرم من فنهم

نون النساء
أشكرك و لا يتعور قلبك و قلب القراء, ما خسرنا شيء ليلحين

وي لوف كويت
i love u and love kuwait too, she deserve it

مذر
علقي مثل ما تبين , تدرين أنا أموت عالكومنتس

بس شي واحد, أنا لست عاطفيا أبدا, بالعكس أنا متهم بالدفاشة و الجفاف العاطفي

لكني بعد ما أقروا العشر و شفت الهستيريا اللي صايرة بساحة الصفاة تذكرت أيام الغزو و شلون كنا في أخس الأوضاع جسديا الا اننا كنا في أفضلها معنويا

شي نفتقده اليوم و حبيت اذكره و أذكركم فيه

تليليت
أول شي صورتك ما طلعتلي

ثاني شي ايميلك اليوم سوالي أزمة , ناس تسويلي أدد و تبي تتهاوش وياي

الله يسامحك:)

زورتوس
أدري عندك شي بتقوله

الشكر لك و ناطرين جديدك

أنونمس
كاتب بالبروفايل أشتغل بالعمل التطوعي و حياك

كويت مافرك
حتى أنا ما كنت أواطن العدوة بس ذاك اليوم بدع, على فكرة , اسلوب النواب الاسلاميين بالخطابة ممتاز, فعلا هم أفضل من يسيطر على الجمهور و يعرفون كيف يصعد و ينزل

جان زين ربعنا يتعلمون البريزينتايشن سكلز هذي

الحجية
يا حجيتنا أنا انسان أعشق كل لحظة عشتها في هذه الحياة , بحلوها و بمرها و حمدالله انا متفائل و معنوياتي عالية و توني مقول قولين بالكرة

يعني حدي مستانس و حتى وانا أكتب الموضوع كنت مستمتع فيه

المحامية
عادي , خليه , ما يدري انه اللي أكبر و أغنى و أكثر نفوذا منه التاريخ ما رحمهم و ليلحين الناس سب و تف فيهم و في سمعتهم

الفلوس و النفوذ زينين, بس السمعة الطيبة أهم و أبقى


و السلام لكم جميعا

أقر الله عيونكم

Anonymous said...

Bachetni

Anonymous said...

يا شباب
والله رجعتوني لذاك الزمان الحلو على كل ما كان فيه من آلام على أهالينا
وكل ما في من خوف على أعراضنا
وكل ما فيه من حزن على ديرتنا
لكن بقول لكم بعض النقاط يا شباب:
1- ترى هذي أول مرة أشارك في بلوغ - ويمكن الأخيرة
مو علشان شي بس لأتي أنا من جيل الكبار في السن شوية لكن هذي الأيام رجعتونا شباب بكل هذه المواقف المبدئية علشان ديرتنتا
2- لا تفترون ولا تتنازلون عن مبادئكم
ترا احنا كبرنا والبركة فيكم الحين
احنا ناس اعيالنا بعمركم والله في الثانوية والجامعة
3- الخطيب والسعدون والنيباري وغيرهم مو دايمين
لازم انتوا تكملون المشوار والأرض اللي طلعتهم مي عاجزة تطلع غيرهم
عسى الله يقويكم وكملوا المسيرة ترى الكويت أمانة بيدينكم

الكويتي الحر said...

كله مطقوق

صح الله لسانك مع انك عورت قلوبنا
والحقيقة انت من القلائل اللي مو منفعلين بزود بتعليقاتهم

تحياتي لك

Q8Maverick said...

kila ma6gog:
Regarding presentation skills, that needs lots of discussion (watch my space) but after we see what will happen regarding the districs (ya rab 5, still retaining hope)

Doctor said...

Kila ma6qoq:
you know at that time i was in the high and i DID NOT know what is the meaning of seni we she3i all what i know is we were kuwaities, wo loved each other and we were sharing our feeling and help each other.
I remember that we were selling the cigarettes marrid which is the copy of marlboro,also working as a baker and also cleaning the street of our fereej.
Thank you for this lovely memories you know i really miss being home.
Oxford University
UK

Doctor said...

Ma6gog:
ابصراحة شوقتي لندوة أحمد الخطيب وياريت اتنزلها على مدونتك علشان اقدر اسمعها لاني بره الكويت وابصراحة ودي اسمع كل اللي قاله
مشكور والله يعطيك العافية

ScarlO said...

Ouch

That really hurts

ii said...

:(
وش هالذكريات؟ .. ليش الهم ليش؟

الحجيه said...

السلام عليكم جميعا

ودي اقول كلمت حق مافي احد مايحب اوطن لاالخطيب ولا غيره حبهم للوطن افضل من غيرهم كلنا نحب الوطن وكل واحد يعبر عن حبه للوطن بطريقته ولكن موحبي للوطن ان اشهر بفلان ولا علنتان فليتذكر الجميع ان كلنا عيوب ومافي احد خالي من العيوب واحنا عليال قريه وكلن يعرف اخيه هذا مثل شعبي قديم اي الكل عارف بعض القصد من هالكلام ان بقول ان الحين انتوا الشباب وانتوا امل المستقبل لاتندفعون وراء شعارات وغيرها لازم تترون وتاخذون الامور بحكمه وعقلان دون انفعاليه لان ماراح تكون بصالحكم ولا بصالح البلد
وبس نشوف حوالينا وحتى الي ابعد منى احنا محسودين من الجميع ما اقول الديره جنه بس احسن من الف غيرها
المهم لانثير الفتن ايام الغزو احنا واخوانا الشيعه والبدون وغيرهم كلنا كنا نعمل مع بعض بحب لهذا الوطن ولحكامه كنا همنا تحريره ليش ما نصير الحين مثل ايام الغزو بس بطريقه ثانيا خل همنا رفعة الوطن وتطوره وتقدمه ونترك الفتن والحزازات ونتذكر انا كلنا كويتين بكل اطياف الوطن الانسان بدون عز الوطن بيضيع وتبهذل واختلاف الراي مومعناه حرب وكل واحد يستغل الموقف لصالحه وزج بالشباب المنفعل الى نفق مظلم انا املي فيكم كبير وانشالله قبل اي خطه تخطونها حسبوها صح حطوا الله والوطن امام عيونكم وعقب تقدم ونتذكر ان العنف عمره ما حل مشكله
الوحده الوطنيه مطلوبه جدا جدا كلنا اخوان بهالبلد المهم لانسمح لاي خبيث
ان يتلاعب بمشاعرنا تجاه الوطن

دمتي عزيزه حبيبتي ياكويت

Abdulaziz said...

first of all...

Thanks for the post.. and your point is duly noted...

i for one wasn't in kuwait at the time... i can't say i wish i was. i mean...

i guess the agony was felt by all kuwaitis everywhere... well i don't know...

good job man.

Shurouq said...

أكثر سفرة ندمت عليها هي رحلتي بتاريخ 25 يوليو 1990 من الكويت إلى الولايات المتحدة

الله لا يعيدها أيام

Mohammad Al-Yousifi said...

السلام

أنونمس
آسف

بو بدر
الله يخليلك العيال و لا تخاف, ما نهد

كويتي الحر
همم لا أعلم لماذا انا لست منفعلا, ربما لأنني مؤمن بأن الزمن خير دليل على ظهور الحق و ربما لأنني ماكل طراقات لمن قايل بس فمتعود مو كل شي أبيه أحصله

كويت مافرك
لا تفقد الأمل ابدا, بلا أمل مفيش حياة

الدكتور
الله يوفقك باكسفورد

و انا أذكر سجاير سومر

بالنسبة للندوة ما أدري والله وين تحصلها, يمكن يحطونها ب
www.nuks.org

سكارلو
اللي صج هيرتس لمن أشوفج تكتبين عربي في بعض المدونات:(

سعلوة
ما هو هم يا سعلوة, هذا جزء مني و من أي كويتي عاش ذيك الأيام

الحجية
همم لن أعلق, كلامك صح

عافور
مشكور حبيبي

الأقرع
مشكور

شروق
الله لا يعيدها و حتى لو عادت اعتقد انني سأبقى

هج
من الأفضل أن لا يندمل , لأن هذا الجرح مفيد و جرح محمود يزيد من الجرعة الوطنية و حب الارض في الانسان

و هو جرح يشرف صاحبه بطبيعة الحال

الشكر للجميع و سامحونا عالقصور

طائر بلا وطن said...

كيف ننسى؟

اتذكر التفاصيل و كأنها أمس

التجربة و الصمود علموني اشياء
وايد بالرغم من اني كنت طفل بو 8 سنوات

ابدعت

و ادمعت العين

والله والله

Anonymous said...

صج كنت صغيره وقت الغزو

بس ما أنسى ذيج الأيام

الدخان والمطر الاسود

السرداب ويمعت الأهل

الأغاني بالتلفزيون عن صدام

وسوالف وايد ..

يعطيك العافيه كله مطقوق .. بوست روعه

:'(

إيكاروس said...

لا شعوريا عيوني دمعت ..كأن من كتب هذه السطور عايش في بيتنا ايام الغزو ..ليش لآ الكويت كانت كلها بيت واحد في تلك الآيام

Anonymous said...

Ya Pash....I like what you & others write, but please DO'T PERSONLISE YOUR COMMENTS, i.e going for the person on the other side rather than his views & believes....Democracy is respecting the views of others...

UNITED WE STAND !