Saturday, July 01, 2006

اليابان

صراحة كنت ناوي أكتب موضوع سياسي جديد, و فعلا بدأت بالكتابة الاّ ان بطاريتي خنست برابع سطر
حسيت اني قاعد أكتب لمجرد الكتابة و أعيد و أزيد عالفاضي
لذلك قررت التمرد على الجو السياسي الطاغي و الكتابة في مواضيع كنت مجهزها قبل حملة نبيها خمسة و كشت فيها من أجل عيون نبيها خمسة
أول موضوع هو رحلتي الى اليابان
***
طبعا أول ما قالولي لازم تسافر اليابان ضاق خلقي لسببين
السبب الأول أن الطريق طويل و متعب جدا و أنا كما تعلمون من أشد أعداء السفر و الطائرات و المطارات
السبب الثاني هو أنني لا أطيق الأكل الياباني و تلوع جبدي منه , أكره السوشي و الساشامي و الجكن ترياكي الله يزيد النعمة
كل أصدقائي يحنون علي جرّب السوشي و جرب السوشي
أقولهم انا عندي نظرية, اذا انا مرتاح و متلذذ بالفلافل و الشاورما و الكباب, شالله حادني أجرب هالأكل الني؟
***
المهم السفرة كانت كالتالي
الكويت
دبي
أوساكا
فوكوكا
***
النصيحة الأولى
عندما تسافر ديرة ما تاكل أكلهم ييبلك علبة أحذية مكرم القاريء و اترسها أكل
شبس و كاكاو و خبز و جبن قلاصات و بفك و مكسرات

غرفة الاجتماعات تنظيمها غريب مثل ما تشوفون

صراحة ما عجبتني, أولا تفتقر لأقل درجة من الفخامة , ذكرتني بأيام المتوسطة

ثانيا اذا كان حالك من حالي و قاطينك بالأخير و ثالث سطرة من المستحيل انك تشوف الشاشة و البريسينتاشون

من أحلى الأشياء اللي شفتها باليابان هي الخطوط الأرضية للعميان

الأعمى يقدر يتبع هذه الخطوط لمعرفة طريقه و لاحظوا ان الخطوط للمشي و النقط للوقوف

طبعا التدخين ممنوع حتى بالشوارع

و فيه أماكن مخصصة للمدخنين ممنوع يدخنون بعيد عنها

عادة غريبة عندهم و اهي ان كل مطعم يحط مجسمات بلاستيكية لأكلاته

طبعا شكل الاكل حدث و لا حرج

حتى كتكاتهم غير

كتكات بو فواكه صراحة عجيب

هذه الكبينة ليست كبينة الطائرة

هذه كبينة التكسي فيها احدعش جهاز

كمبيوترات و لاسلكيات و خبة تقول راكب صاروخ

الحمام خيالي

المرحاض و انتوا بكرامة الكتروني

تقدر تسخن المقعد و بعد ما تخلص ترعص دقمة يرش عليك الماي من تحت

شعور ممتاز انصحكم تجربونه

الأقوى من المرحاض هي شاشة الأل سي دي اللي بالحمام

المشكلة ماكو شي بالانجليزي تطالعه

أخيرا و ليس آخرا

ما عندهم سيارات لكسز

عندهم تويوتا بشكل اللكسز

***

من الأشياء الغريبة اللي شفتها هناك و ما قدرت أصورها هي أن الموظفين

يمارسون تمارين رياضية خاصة في الصباح الباكر أول ما يوصلون الدوام, الناس هناك مكاين

***

ملاحظة أخرى و هي ان أماكن المساج لا يسمحون بها للأجنبي

حتى بالمساج عنصريين

27 comments:

Яeema said...

أول شي أهنيك هلي الرحلة المكوكية لعالم التكنلوجيا العجيب و الغريب

ثانيا
من الممتع جدا إن الواحد بشوف الناس وين إوصلت

حبييت الحمام
مو إحنا لما الحين حممامات عربية

بس ما فهمت إشلون الخطوط الأرضية حق العميان؟
بالسنسر يعني؟؟

صراحة
شي شي

Zico supreme said...

سبحان الله يا مطقووق,
انا لو ما اكل سوشي مرتين بالأسبوع أموت, و ثلاث أرباع سفراتي بس أجرب طيرانات و اشوف مطارات يديده.
ان شفتك بوكلك سوشي غصب :)

Erzulie said...

Loool! That was funny!
La yismi3ik Purg & the Edo group! Inzain, wala mara jarabt sushi? Aw jarabta oo ma3jibik?
I laughed so hard at the "7amam" part and the "makayen." I admire their work ethic bes no way a9eer robot mithil'hom.

And I miss my kabab :( Legait mokan ibee3 sandaweechat falafel oo shawerma la7am bes maga9a, it's like $10 per sandwich! I miss my 150 fils sandwiches :(

Temetwir said...

3ayal il ragy eb 30 dinar ha?

i find what you report of them doing some exercises at work the most intriguing .. madri laish atkhayalhom ye6amroon in perfect rows o kel wa7ed "yesami3" jadaawel el tharrb

neelaah said...

خوش رحله
اهم شي الكتكات

بس ما سألت لنا ليش ماكو لكزس

Anonymous said...

انا من الناس الي حالفهم الحظ و رحت اليابان , عالم عحيب وكل شيء في حلو خاصة الشعب , بس الاكل الله لا يوريكم .

رشيد الخطار said...

التكسي عجيب
وترى مو كل السوشي ني.. لازم آخذك وتجربه.. حده قوي.. وراح يعجبك

لقيت الديرة اللي بمدارسها بملاعبها وقطاراتها بأهلها تحت الماي والا لأ؟

ScarlO said...

:-D

Yes! Finally something other than politics!

I don't like sushi as well. I mean I do eat it but I'm just not too obsessed about it like some people are.

Unknown said...

اول شى الكتكات الله يهداك لو يابلى منه
لكزس ما ادرى بس اعتقد ويمكن اكون مخطئ لن مصممة للتصدير الخارجي

الحمام ما ينفعنا اهنا تدفئة بشهر 8 ويييع :))

هذا ينفع حق البر اعتقد لان برررد

وعلى قولة الاخ orecal

بدر البدور بعد افتتاح الفرع الجديد يفكر بالاحتراف باليابان
تحياتى
وخوش رحلة احسنلك من ديرة ثانية

Honey™ said...

b9ra7a ma 3ndik salfa .. a7la ma fi il yabaneen akalhom ,, YUMMY YUMMY latheeth TRY IT mako a7la min aklhom

Mother Courage said...

انا من زمان احن ابي اروح اليابان بس محد ملقيني وي يقولون بعيدة و دوخة راس ...بس يقولون غالية وايد و يقولون الريل وي مال المطار بوسط البحر صج ؟؟

tweety said...

أنا معاك ألفين بالمية بأن الأكل الياباني اييب اليهد الله يزيد النعمة بس ما شفناك كلمتنا عن اليابانيات ( يبطون جبدي وايد ضعاف وبوتيت لو نذبح روحنا يووع ما نصير نفسهم يعلهم الضربة ) مادري أروح هناك شهر تلوع جبدي من أكلهم وأصوم دب الدهر ونزل لي 5 كيلو وأرد؟

Mohammad Al-Yousifi said...

ريما
مشكورة و جاوبوا عليك تحت

زيكو
انا عندي ثلاث مواضيع سابقة مخصصة للتحلطم على الطيارات و المطارات انا دم ضروسي السفرات الطويلة و المشكلة سفرة اليابان كانت يوم روحة و يومين قعدة و يوم ردة, تخيل التعب

أرزولي
أول شي انتي بأي مدينة ؟؟ انا ادورلك اقرب مطعم شورما و كباب؟

و نعم لم و لن و لا و مستحيل آكل سوشي, انا حدي بكي بالأكل

تمي
عجيبة تمارينهم كأنها تمارين الكاتا مالت الكراتيه بس على حركة بطيئة, بين الكاتا و اليوغا

نيله
مثل ما قال أخ مشاري أعتقد ان اللكسز بس للتصدير

أنونمس
أوافقك الراي اليابانيين محترميين الى آخر درجة بس المشكلة ما نفهم شيقولون فتعبت الصراحة من هالسالفة

رشيد
اليابان كلها تحت الماي, مطار اوساكا كلفهم اربعة بليون دولار لأنهم بنوه على جزيرة صناعية

اقولك الاوادم مكاين هناك شغالين , شي عجيب

سكارلو
الشورما و بس

أوركل
حبي انا من ربع شندويشات الغدير, المشكلة كل ما اروح يتحرش فيني الايراني مال الشوارما لين بطلت اروح خوفا على شرفي

لوول

مشاري
اعتقد انا ما استانست لأن الرحلة كانت قصيرة جدا و المدينة اللي كنا فيها مو كبيرة و صناعية و الطريق طويل

و أتعس شي هناك انهم مييييييييييييح انجليزي

حتى المحلات و المطاعم ماكو انجليزي

مي هو
انت الخبير حسافة ما كنت معاي

هوني
ماقدر آكل اكلهم لأسباب كثيرة بس ماشاءالله بناتهم كلهم أجسام صخر لأن أكلهم ما فيه دهون و صحي

نادر تلقين ياباني أصلع أو متين

عكسنا

هامور
يبا رحت اليابان و رديت من شهر, هالموضوع قديم بس كنت امأجله, انشاءالله اييبلك كل شي نكست تايم

بوجويس
شوف من ناحية شبابهم مثلنا اي, صراحة شبابهم و شيابهم سرسرية, يعني اكو اماكن المساج و الدعارة منتشرة

و تحليلي لهذه الظاهرة ان اليابانيين شعب منتج و فلسفتهم ان الرغبة أو الكبت الجنسي يعيق الشخص من الانتاج و التركيز

فموفرين لك أماكن تفرغ فيها رغبتك الجنسية عشان تقوم ثاني يوم الصبح و سيده المصنع تعمل و تنتج

يمكن أكون غلطان

مذر
صج صج صج

تويتي
اليابانيات و ما أدراكي ما اليابانيات

محترمات و هاديات و ضعيفات و رشيقات و على قولتج بتيت

و رياييلهم بعد بتيت

صراحة شكلهم طيبين و يونسون بس ماكو لغة تفاهم معاهم

والله تعبت و انهد حيلي و انا أحاول اشرحلها أبي محول كهربه و شوكة و سكين بلاستيك

مشموشي

iDip said...

this is the post I was waiting for... finally! :)

did you have a chance to ride the bullet train?

Pepsi-guy said...

والله زين تسوي بابتعادك عن الساحة السياسية باخر مقاله

يعني يبيلنا كم يوم عشان نصحصح من الطراق (الراشدي) الي خذيناه من جمال العمر والحكومة ومقالتك تاخذنا بعيد عن الموضوع وتخفف عوار الراس والشعور بالاحباط الي حايشني من يومين

White Wings said...

أنا وبوجويس تونا عندنا نقاش على هذا الموضوع على مدونتي، بودي جداً أزور اليابان، وأما المرحاض فشي عجيب، صراحة بزور المنطقة بس على حس المرحاض
أنا شفت المرحاض ذو نظام التنظيف الذاتي في سويسرا، عجيب، ينظف المقعد بروحه..
موضوعي كلش موشي :)

bo_ghazi said...

Seems like a nice trip & good pics too :)

Anonymous said...

ee hathi il yaban... ma gala6 khalid il nifisi allah yir7oma lama gal ena shayif deera 3adla ib ahlha ib bayanat'ha ib qi6arat'ha o madaris'ha o mala3ibha ta7t il may:P ooo ham 7adiq feeha:P!

bo9ali7 said...

موضوع اكثر من رائع, اهنيك
احلى شغلة الخطوط الارضية للعميان
....
ملاحظتك الاخيرة مالت المساج..لا تعليق ;)

Zico supreme said...

على طاري المطارات, شلون كانساي؟
أنا فكرتي عن المطار الزين اهي كوفي شوب و اطلاله على الرن وي و محلات وايد و مكان أقدر أصور الطيارات منه

Pepsi-guy said...
This comment has been removed by a blog administrator.
Pepsi-guy said...

kila ma6goog
Since both alia and shurouq are in lebanon they wont be able to answer the question you posted on Miscellaneous' blog till it's too late.

Just tune in to سيره وانفتحت tonight (monday) on Future TV at 10:30 pm Kuwait time as shurouq will be interviewed live to talk about the kuwaiti elections.

متفرغ said...

الحمد لله على السلامة ..... بصراحة كله فصوب و المرحاض (و انتو بكرامة) فصوب ثاني ما في شي سلم من تطويرهم ..... و الكت كات يم يم ..... تمارين من الصبح و الله لهم بارظ انا يالله اقدر اشيل نفسي هالدور بعد اسوي تمارين .... و يعطيك العافية على هالبوست :)

Mohammad Al-Yousifi said...

آيدب
لا والله قزرتها بالتكسي الفضائي اللي مصوره

بو جويس
شيشتني والله , شكلي بطلع أي عذر حق الدوام يدزوني اليابان

بيبسي
أختلف معاك الف بالمية , احنا عطينا حق الحكومة السابقة و جمال و غيرهم بدل الطراق عشر, و وريناهم ان سكوت الشعب له حدود ان تجاوزوها ما راح نحشمهم و نجاملهم

ترى النتايج 10 0 لصالح البرتقالي, يبقى ان بعضنا الي متعصبين ليبراليا يمكن يكونون زعلانين لخسارة النيباري و الهارون و الراشد

انا اشوفها ان خسرناهم بس كسبنا الشايع و باسل كان قريب جدا و العبدالجادر هم كان قريب جدا يعني النتايج ماهي بذاك السوء

أذكر أيام كنا نتمنى فوز عشرة من التسعة و عشرين

و على شروق و عاليا صراحة هنيالهم و بنتابع و نشوف , انشاءالله يبيضونها

الأجنحة البيضاء
فعلا بيت الراحة

بوغازي
والله تعب و عوار راس, يعني من الصبح اجتماعات لين ترد الهوتيل ما فيك شدة على الطلعة

أنونمس
الله يرحمه , كان له نظرة مستقبلية

بو صالح
لوول انا ما احب المساج بس اللي معاي كانوا يبون

زيكو
والله خوش مطار بس اذا عندك ترانزيت وقت طويل اطلع من المطار روح مجمع آوتليت يم المطار فيه محلات ماركات بس وايد الأسعار رخيصة مو بعيد يمكن 10 دقايق بأول اوساكا

كتي
نعم اليابان نظيفة و اوادمها و شوارعها و مبانيها نظاف و مرتبة حيل

متفرغ
مشكور حبي و نعم ماشاءالله شياب بس نشاط و فعلا مثل ما قلت مكاين

و نعم الديرة غالية نار

اذكر مرة شريت بولو شيرت من امريكا بخمستعش دينار

سعرها بدبي كان يطلع ثلاثين دينار

سعرها باليابان ستين دينار

و قس على ذلك

Unknown said...

عاد انا صج بموت وأروح اليابان بس المشكلة اني مو لا قي لي صاحب يطاوعني ولا شحلاتها القطرية كويت دوحة اوساكا كلها كم يوم ونرجع نريح في بانكوك حق المشترى
وكنك ما تدري راد كويتك رايح يابانك مار على تايلندك
والرحلة الطويلة خير وبركة حق القراية ومطالع لفلام

الكويتي الحر said...

مطقوق

كونيتي واه
:)

بالسلامه

Яeema said...

HaaMoor :
THanks alot for the explanation ;)